Pa lys ddylwn i wneud cais iddo?
Er bod rôl ynad bob amser yn ymwneud â gwrando ar amrywiaeth o achosion a defnyddio barn gadarn i wneud y penderfyniadau cywir, mae ynadon yn gweithio mewn dau amgylchedd gwahanol – y llys troseddol a’r llys teulu. Os hoffech ddod yn ynad, bydd angen i chi ddewis pa fath o lys rydych eisiau gweithio ynddo. Yn y naill amgylchedd neu’r llall, bydd gennych ystod eang o gyfleoedd i wneud gwahaniaeth ystyrlon i unigolion, ac i gymdeithas ehangach.
Sut beth yw gweithio fel ynad yn y llys troseddol?
Mae bron pob achos yn y llys troseddol yn dechrau mewn llys ynadon, a delir a thua 95% ohonynt yno. Fel ynad yn y llys troseddol, byddwch yn helpu i benderfynu ar y camau nesaf. Gall achosion gynnwys cam-drin domestig, troseddau cyffuriau, troseddau moduro, dwyn, ymosodiadau, difrod troseddol a throseddau trefn gyhoeddus.
Beth fyddaf yn ei wneud?
Byddwch yn gwrando ar ac yn ystyried yr holl dystiolaeth a ddarparwyd gan y llys gyda gweddill eich mainc. Os yw diffynnydd wedi pledio’n euog neu wedi ei gael yn euog, gallwch osod dirwyon, cosbau cymunedol (gan gynnwys gwaith di-dâl neu raglen adsefydlu caethiwed) a dedfrydau o garchar. Byddwch yn traddodi troseddau mwy difrifol i Lys y Goron, os yw diffynnydd wedi pledio’n euog neu wedi ei gael yn euog ar gyfer dedfryd, neu am dreial llawn gyda barnwr a rheithgor.
Efallai ei fod yn swnio’n frawychus, ond mae’n bwysig cofio na fyddwch yn gwneud y penderfyniadau hyn ar eich pen eich hun. Hefyd, bydd gennych hyfforddiant arbenigol a chymorth parhaus i’ch helpu, bob cam o’r ffordd.
Rhagor o wybodaeth:
Cyn gwneud cais i ddod yn ynad yn y llys troseddol, bydd angen i chi fynd i lys ynadon o leiaf ddwywaith i arsylwi achos. Gallwch ddod o hyd i lysoedd ynadon yn eich ardal yma.
Byddem yn argymell cysylltu â’r llys ymlaen llaw er mwyn i chi gael gwybod mwy am pryd i fynychu.
Gwylio
- Bydd y ffilm fer hon ar waith ynadon yng Nghymru a Lloegr yn dweud mwy wrthych am y gwaith y mae ynadon yn ei wneud mewn llysoedd a’r mathau o achosion y maent yn delio â nhw.
- Bydd y ffilm fer hon ar sut mae troseddwyr yn cael eu dedfrydu yng Nghymru a Lloegr yn rhoi cipolwg i chi ar y mathau o ddedfrydau y gall ynadon eu gosod.
- Y ffilm fer hon lle mae’r Ynad Khadija yn siarad am ei rôl fel ynad – YouTube.
Sut beth yw gweithio fel ynad yn y llys teulu?
Fel ynad yn y llys teulu, gallech fod yn gwneud penderfyniadau sy’n effeithio ar blant sy’n agored i niwed, gan gefnogi rhieni sydd wedi gwahanu i wneud trefniadau ar gyfer eu plant, gorfodi gorchmynion cynhaliaeth plant a helpu i atal cam-drin domestig. Mae’n rôl bwysig lle gallwch gael effaith sylweddol ar fywyd a lles plentyn, a dyfodol teulu.
Mae’n rôl a fydd yn rhoi cipolwg i chi ar amrywiaeth o faterion lles plant ac yn eich galluogi i wneud gwahaniaeth gwirioneddol i’r gymuned gyfan. Gall olygu delio â rhai sefyllfaoedd emosiynol anodd, ond bydd gennych gefnogaeth a hyfforddiant pwrpasol i’ch helpu i ddatblygu’r sgiliau y bydd eu hangen arnoch i’w trin yn effeithiol.
Rhagor o wybodaeth
Mae’r llys teulu yn ‘lys caeedig’, sy’n golygu nad yw ar agor i’r cyhoedd, felly ni allwch ymweld â’r llys teulu nac arsylwi yno. Ond bydd angen i chi edrych ar wybodaeth sydd ar gael i’r cyhoedd am y llys teulu – dyma le da i ddechrau:
Canllaw Advicenow ar fynd i’r llys teulu.
Ydych chi erioed wedi ystyried dod yn ynad?
Ynadon yn y llys teulu yn siarad am y rôl
Fideo chwarae rôl Ynadon yn y Llys Teulu: Achos Cyfraith Breifat
Fideo chwarae rôl Ynadon yn y Llys Teulu: Achos Cyfraith Gyhoeddus